Kæra stuðningsfólk

Þakka ykkur fyrir stuðninginn. Ég er enn að meðtaka sigurinn og veit að án ykkar hefði þetta ekki verið mögulegt. Þarna kom ég nánast óþekkt og með óeigingjarnri aðstoð ykkar og tiltrú tókst okkur að ná öðru sæti í öðru hvoru Reykjavíkurkjördæmanna.

Prófkjörsbaráttan var skemmtilegri en ég átti von á og nú tökum við kosningabaráttuna með sama stæl. Við skulum taka forystuna í því að skapa samfélag jafnaðar á Íslandi og leiða Ísland inn í Evrópusambandið.

Þið eruð ótrúleg og ég er svo stolt af því að verða fulltrúi ykkar á Alþingi. Þegar fyrstu tölur voru birtar varð mér ljóst hvílíkan sigur við höfðum unnið. Nú þarf ég að standa við stóru orðin og treysti því að þið standið jafn þétt við bakið á mér í því að breyta flokknum og Íslandi eins og þið gerðuð í prófkjörsbaráttunni. Sjálf hef ég verið óhrædd við að gagnrýna valdhafa og treysti því að ég fái sömu meðhöndlun frá ykkur.

Baráttu- og þakkarkveðjur

Sigríður Ingibjörg

Nú lokar kjörstað eftir rúman klukkutíma og þá gleðjumst við eða tökum vonbrigðum af hetjuskap. Vinna í þágu Sigríðar Ingibjargar var án efa skemmtilegasta starfið sem völ var á í þessari kosningabaráttu, illa launað í efnislegum gæðum en því betur í hinum óefnislegu. Við þökkum öllum þeim fjölmörgu sem lögðu sitt af mörkum og vonum að framlag þeirra, vilji kjósenda til að endurnýja og yfirburðir frambjóðandans nægi til að tryggja hagstæð úrslit. Við höldum með Siggu, hvernig sem fer!

Stuðningsfólk

Í dag, föstudaginn 13. mars og daginn fyir lokadag höldum við hádegisfund um Seðlabankann og krónuna í kosningaskrifstofu minni á Laugavegi 7. Edda Rós Karlsdóttir og Eiríkur Bergmann koma í spjall með mér og ykkur öllum um grunnstoðir fjármálakerfisins, evru, krónu og annað slúður. Alvörumál, skemmtilegt fólk, veitingar í slöku meðallagi og allir hjartanlega velkomnir!

Sigríður Ingibjörg

Seðlabanki Íslands hefur nú skilað bráðabirgðaniðurstöðum um greiðslu- og skuldavanda heimilanna. Þar kemur fram að staða heimila er afar misjöfn. Alls eru um 18% heimila í landinu með neikvæða eiginfjárstöðu. Rétt er þó að hafa í huga að neikvæð eiginfjárstaða þarf ekki að vera vandamál í sjálfu sér ef fólk stendur undir greiðslubyrði lánanna sinna.

Þessar niðurstöður benda til þess að almennar aðgerðir til aðstoðar heimilunum geti orðið ómarkvissar og þar með kostnaðarsamar. Beina þarf aðgerðum að heimilum sem voru í viðkvæmri fjárhagstöðu fyrir, svo sem einstæðum foreldrum, öryrkjum og lágtekjufólki. Annar hópur er fólk sem hefur misst atvinnuna, sá þriðji er ungar fjölskyldur sem keyptu íbúð á allra síðustu árum á háu verði og eru mjög skuldsettar. Fjórði hópurinn er heimili með fasteignalán í erlendum myntum.

Í dag er forgangsverkefni að tryggja húsnæðisöryggi því erfið staða á fasteignamarkaði og neikvæð eiginfjárstaða hluta heimila draga mjög úr möguleikum þeirra til að bregðast við með hefðbundnum hætti, þ.e. með því að minnka við sig, greiða upp skuldir og lækka þannig greiðslubyrði. Koma þarf í veg fyrir að tímabundinn greiðsluvandi leiði til vanskila og gjaldþrota heimilanna og tryggja varanleg úrræði fyrir þau heimili sem eru í mestum vanda og munu ekki ráða við skuldbindingar sínar, þegar hagur vænkast.

Með þessu móti er hægt að tryggja velferð flestra heimila og að samfélagslegur kostnaður af skuldavanda heimilanna verði sem minnstur. Þessar aðgerðir munu einnig draga úr líkum á því að fasteignaverð lækki umfram það sem er talið samræmast jafnvægi og þar með frekari eignarýrnun í húsnæði.

Í nóvember voru lög um greiðslujöfnun fasteignaveðlána samþykkt og frekari greiðsluerfiðleikaúrræði hjá Íbúðalánasjóði. Fyrir þinginu liggur frumvarp um greiðsluaðlögun og vonandi verður það að lögum á allra næstu dögum. Ekki liggur ljóst fyrir hvernig lán í erlendri mynt verða meðhöndluð, þ.e. hvort þeim verður breytt yfir í íslenskar krónur eða öðrum úrræðum beitt til að lækka greiðslubyrði. Í dag tilkynnti Íslandsbanki að viðskiptavinum bankans bjóðist greiðsujöfnun á lánunum og væntanlega munu aðrar lánastofnanir bjóða upp á svipuð úrræði.

Forgangsverkefni okkar eru endurskipulagning bankanna, afnám gjaldeyrishafta og húsnæðisöryggi fjölskyldnanna.

Oft er talað um að í ástandi dagsins í dag felist mörg tækifæri. Stundum finnst mér þessi umræða fela í sér ákveðna afneitun en auðvitað er þetta hárrétt. Í mínum huga eru sóknarfærin fólgin í vitundarvakningu okkar sem þjóðar.

Samfara hruninu hefur orðið mikil lýðræðisvakning í íslensku samfélagi. Þjóðin mun veita stjórnmálaflokkunum aðhald á næstu árum og krefjast ákvarðana sem tryggja almannahagsmuni en ekki sérhagsmuni. Það veldur þó áhyggjum að fjölmiðlar standa illa í dag og eru fáliðaðir. Almennir borgarar eru að knýja á og ganga sjálfir í málin ef þeim finnst fjölmiðlar ekki standa sig. Gott dæmi um það er fundur Evu Hauksdóttur og Árna Daníels Júlíussonar, fulltrúa regnhlífasamtakanna Samstöðu, sem fóru á fund fulltrúa Alþjóða gjaldeyrissjóðsins í morgun.

Þættir Egils Helgasonar eru gott dæmi um þær breytingar sem orðið hafa í íslenskum veruleika. Ég var löngu hætt að horfa á þættina því ég var svo leið á stjórnmálamönnum, yfirleitt karlkyns, sem gjömmuðu hver ofan í annan. Nú eru þættirnir fullir af ótrúlega áhugaverðu fólki sem hefur eitthvað mikilvægt fram að færa.

Eva Joly kom sá og sigraði í þættinum sl. sunnudag. Ég hef oft hugsað til þess hversu erfitt það verði fyrir stjórnvöld að fara í aðgerðir sem skerða lífskjör þjóðarinnar án þess að “glæponarnir” þurfi að svara fyrir gjörðir sínar og hægt verði að ná hluta af ránsfengnum til baka. Ákvörðun ríkisstjórnarinnar um að fá Evu Joly sem sérstakan ráðgjáfa vegna rannsókna á efnahagsbrotum er ein ánægjulegasta frétt sem við höfum fengið lengi.

Það er líka athyglisvert að þjóðin treysti tveimur þroskuðum konum best til erfiðra verka, Jóhönnu Sigurðardóttur og Evu Joly.

Ingibjörg Sólrún Gísladóttir hefur átt við alvarleg veikindi að stríða frá því bankarnir hrundu. Þrátt fyrir veikindin er það henni að þakka að Ísland náði samningum við alþjóðasamfélagið og þar með Alþjóðagjaldeyrissjóðinn. Hún myndaði minnihlutastjórn Samfylkingar og Vinstri grænna og skapaði þar með starfsfrið til að hægt væri að fara í nauðsynlegar aðgerðir í efnahagsmálum og málefnum heimilanna. Hún fór þess á leit við Jóhönnu Sigurðardóttur að hún veitti forystu fyrstu ríkisstjórn Íslands með jöfnum kynjahlutföllum. Næstu ríkisstjórnir hljóta að þurfa að taka mið af því. 

Ingibjörg Sólrún hefur nú tekið sér hlé frá stjórnmálastörfum til að ná fullri heilsu. Ég óska henni góðs bata og þakka henni fyrir öll þau þrekvirki sem hún hefur unnið í íslenskum stjórnmálum hingað til.

Það er staðföst trú mín að Jóhanna Sigurðardóttir eigi að verða næsti formaður Samfylkingarinnar. Flokkurinn og þjóðin treysta engum betur til að takast á við þau verkefni sem framundan eru. Það verða erfið verkefni en þjóðin treystir Jóhönnu til að taka ákvarðanir með almannahagsmuni að leiðarljósi. Ég skora því á Jóhönnu Sigurðardóttur að gefa kost á sér sem formaður í Samfylkingunni.

Þegar ljóst var að efnt yrði til kosninga í vor fann ég fyrir miklum stuðningi úr ýmsum áttum (á maður ekki alltaf að segja þetta?) og ákvað að demba mér í prófkjör Samfylkingarinnar þótt fyrirvarinn væri stuttur og ástandið að mörgu leyti erfitt fyrir nýjan frambjóðanda. En við þurfum nýtt fólk á fremsta bekk og ég vona að stuðningur góðs fólks fleyti mér í eitt þerra.

Hvers vegna ættuð þið að styðja mig í prófkjöri?

·      Ég hef góða þekkingu á efnahagslífinu, ríkisfjármálum, skattamálum, málefnum launafólks, húsnæðismálum, almannatryggingum og fjármálum heimilanna.
·      Ég hef hugrekki til að fylgja minni sannfæringu og læt engan þagga niður í mér.
·      Ég er jafnaðarmaður og femínisti fram í fingurgóma.
·      Ég hef verið lengi virk í starfi flokksins og lít á pólitík sem samfélag en ekki leikjafræði.
·      Ég er góður félagi og hef húmor fyrir sjálfri mér. Það síðarnefnda er fremur sjaldgæft meðal stjórnmálamanna.
·      Ég er sérlega frambærileg manneskja en ber þess óneitanlega merki að hafa talað mjög vel um sjálfa sig við mjög marga síðustu daga.
·      Ég er sannfærð um að endurnýjun í framvarðasveit Samfylkingarinnar sé nauðsynleg til að ná góðum úrslitum í komandi kosningum.

Ég veit þetta er dálítið ég-ég-ég en það verður að hafa það í svona viku í viðbót!

Sigríður Ingibjörg

Það gleymir enginn þessum magnþrungnu lokaorðum forsætisráðherra í ávarpi sem hann flutti þjóðinni mánudaginn 6. október til að tilkynna að frumvarp um neyðarlög yrði lagt fyrir Alþingi síðar um daginn. Sama kvöld varð frumvarpið að lögum, strax í kjölfarið fór ein af skilanefndum Fjármálaeftirlitsins inn í Landsbankann og á fimmtudeginum í sömu viku voru skilanefndir búnar að taka yfir alla viðskiptabankana þrjá. Þann dag var bankaráðsfundur í Seðlabankanum og undirrituð skoraði á bankastjórnina að fara frá og sagði sjálf af sér í kjölfarið.

Í yfirlýsingunni sem ég las upp á fundinum og sendi fjölmiðlum undirstrikaði ég að sátt verði að ríkja meðal þjóðarinnar um stjórn Seðlabankans til að sem bestur friður náist um það uppbyggingarstarf sem framundan er. Til að svo geti orðið væri mikilvægt að stjórn Seðlabankans segði af sér tafarlaust. Eins og alþjóð veit hefur bankastjórnin ekki tekið áskorun minni.